KAMATI YA SIASA YAKAGUA NA KURIDHISHWA NA UTEKELEZAJI WA ILANI YA CCM WILAYANI KILWA

Posted on: February 12th, 2026

Leo, Februari 12, 2026, Kamati ya Siasa ya CCM Mkoa wa Lindi imeendelea na ziara ya kukagua utekelezaji wa miradi ya maendeleo katika Wilaya ya Kilwa, ikiwa ni sehemu ya kuhakikisha Ilani ya Chama Cha Mapinduzi (CCM) inatekelezwa ipasavyo wilayani humo.

Ziara hiyo iliongozwa na Katibu wa CCM Mkoa wa Lindi, Ndg. Barnabas Y. Essau, akiambatana na Mwakilishi wa Mkuu wa Mkoa wa Lindi, Ndg. Juhudi Mgallah ambaye ni Katibu Tawala Msaidizi Sehemu ya Mipango na Uratibu, Mkuu wa Wilaya ya Kilwa, Mhe. Mohamed Nyundo, wajumbe wa Kamati ya Siasa ya CCM Mkoa na Wilaya, Mkurugenzi Mtendaji wa Halmashauri ya Wilaya ya Kilwa, Ndg. Hemedi Magaro, pamoja na Wakuu wa Idara na Vitengo wa Halmashauri.

Baada ya kukagua miradi mbalimbali, Kamati imeridhishwa na kiwango cha utekelezaji na kupongeza juhudi zinazofanywa na uongozi wa Wilaya katika kusimamia miradi hiyo, kwa kuzingatia maelekezo ya Mheshimiwa Rais, Dkt. Samia Suluhu Hassan.

Akizungumza mara baada ya ukaguzi, Ndg. Essau amesema:

“Tumekagua miradi na kujionea utekelezaji wake. Miradi ni mizuri na inatekelezwa kwa kiwango cha kuridhisha. Nawapongeza viongozi wa Wilaya, Mkuu wa Wilaya na Mkurugenzi wa Halmashauri, kwa kazi nzuri mnayoifanya. Hongereni sana wanakilwa.”

Miradi iliyotembelewa ni pamoja na ujenzi wa Ghala la Kuhifadhia Mazao la Halmashauri, ujenzi wa Daraja la Somanga, ujenzi wa Soko la Wafanyabiashara Wadogo katika Kijiji cha Njia Nne, pamoja na ujenzi wa Stendi ya Nangurukuru.

Kwa upande wake, Ndg. Mgallah ameupongeza uongozi wa Wilaya kwa hatua kubwa za maendeleo zilizofikiwa, akieleza kuwa maboresho yaliyofanyika yameleta mabadiliko chanya na taswira mpya ya maendeleo katika eneo hilo.

Ziara hiyo ni sehemu ya tathmini ya mara kwa mara ya miradi ya maendeleo inayolenga kuimarisha uwazi na uwajibikaji, kuongeza kasi ya utekelezaji, na kuhakikisha miradi inaleta manufaa ya moja kwa moja kwa wananchi wa Wilaya ya Kilwa.