TAKUKURU LINDI YAJIPANGA KUDHIBITI MIANYA YA VITENDO VYA RUSHWA KATIKA UCHAGUZI WA SERIKALI ZA MITAA.

Posted on: November 19th, 2024

Taasisi ya Kuzuia na Kupambana na Rushwa(TAKUKURU) Mkoa wa Lindi katika kipindi cha Julai hadi  Septemba imetoa taarifa ya ufuatiliaji na utekelezwaji wa miradi ya maendeleo kumi yenye thamani ya sh.Bilioni 20 katika sekta ya elimu,maji ,ujenzi na afya .

Akizungumza na waandishi wa habari  ofisini kwake Mkuu wa TAKUKURU Mkoa wa Lindi Bi. Asha Kwariko amesema wamefanya ufuatiliaji wa utekelezaji wa miradi 10 ya Maendeleo na miradi miwili,wameikuta na dosari.

"Tumeendelea na ufatiliaji wa utekelezaji wa miradi 10 ya maendeleo yenye thamani ya zaidi ya shilingi bilioni 20 katika sekta za Elimu,Maji, Ujenzi na Afya."amesema Kwariko.

Amesema pia katika ufuatiliaji huo miradi 2 ilikutwa na mapungufu madogo madogo ambayo hatua mbalimbali zilichukuliwa ikiwa ni pamoja na kuwashauri warekebishe mapungufu hayo.

Aidha, Bi. Kwariko ameeleza kuwa TAKUKURU Mkoa wa lindi imejipanga vyema kudhibiti vitendo vya rushwa katika uchaguzi wa serikali za mitaa unaitarajiwa kufanyika mwishoni mwa mwezi Novemba.

"Tunatarajia kuongeza  juhudi ya kuzuia rushwa kwa kuhamasisha ushiriki wa wananchi kupitia nyenzo mbalimbali za uelimishaji umma katika kudhibiti vitendo vya rushwa kwenye uchaguzi wa serikali za mitaa ili wasirubuniwe kwa hongo au vishawishi vyovyote vile na kudhalilisha utu wao kwa kupokea rushwa ili wamchague kiongozi asiyefaa ama kujitoa katika kugombea au kupiga  kura, na tayari tumeshafanya semina na makundi mbalimbali ikiwemo vijana, waandishi wa habari na viongozi wa dini tuna imani watafikisha ujumbe wa kupinga rushwa katika uchaguzi huu na tunaoutarajia mwakani" ameeleza.

Aidha, Mkuu wa TAKUKURU  Mkoa wa Lindi amewaomba wadau wote kuendelea kuwaunga mkono katia kuzuia vitendo vya rushwa kwa kutoa taarifa za viashiria vya rushwa katika uchaguzi wa serikali za mitaa na miradi mingine ya maendeleo inayotekelezwa na serikali.