KAMATI YA SIASA YA CCM MKOA WA LINDI YAKAGUA UTEKELEZAJI WA MIRADI YA MAENDELEO HALMASHAURI YA MTAMA

Posted on: February 10th, 2026

Kamati ya Siasa ya CCM Mkoa wa Lindi, ikishirikiana na wataalam kutoka Ofisi ya Mkuu wa Mkoa wa Lindi, imefanya ziara rasmi ya ukaguzi wa utekelezaji wa miradi ya maendeleo katika Halmashauri ya Wilaya ya Mtama.

Ziara hiyo imefanyika Februari 10, 2026, ikiongozwa na Katibu wa CCM Mkoa wa Lindi, Ndg. Barnabas Y. Essau, akiwa ameambatana na muwakilishi wa Mkuu wa Mkoa wa Lindi, Ndg. Juhudi Mgallah, Katibu Tawala Seksheni ya Mipango na Uratibu. Ziara hiyo pia ilihusisha Mkurugenzi wa Halmashauri ya Wilaya ya Mtama, Ndg. Anderson Msumba, Wajumbe wa Kamati ya Siasa ya CCM Mkoa wa Lindi, Wajumbe wa Kamati ya Siasa ngazi ya kata, pamoja na Wakuu wa Idara na Vitengo wa Halmashauri ya Mtama.

Baada ya kutembelea na kujionea utekelezaji wa miradi mbalimbali ya maendeleo, Kamati ya Siasa ya CCM Mkoa wa Lindi ilieleza kuridhishwa na kasi na ubora wa utekelezaji wa miradi hiyo yenye thamani ya zaidi ya shilingi bilioni 123, ikiwa ni sehemu ya utekelezaji wa Ilani ya Chama Cha Mapinduzi (CCM), inayolenga kuwaletea wananchi maendeleo endelevu.

Akizungumza wakati wa ziara ya ukaguzi wa mradi wa Kituo cha Mabasi Mtama, Katibu wa CCM Mkoa wa Lindi, Ndg. Barnabas Essau, alisema mradi huo unaotekelezwa kwa gharama ya zaidi ya shilingi bilioni 2.4 kupitia mapato ya ndani ya halmashauri, unalenga kuboresha miundombinu ya usafiri na kuongeza ufanisi wa huduma kwa wananchi.

Aidha, Kamati hiyo ilitembelea mradi wa Shule ya Sekondari ya Amali Mpenda wenye thamani ya shilingi bilioni 1.6, pamoja na mradi mkubwa wa maji wa Nyangao unaotekelezwa kwa gharama ya zaidi ya shilingi bilioni 119, unaotarajiwa kuhudumia vijiji 64 pindi utakapokamilika.

Ziara hiyo ni sehemu ya utaratibu endelevu wa ufuatiliaji na tathmini ya miradi ya maendeleo unaolenga kuimarisha uwajibikaji, kuongeza ufanisi wa utekelezaji, na kuhakikisha miradi inatoa matokeo chanya na yenye tija kwa wananchi wa Halmashauri ya Wilaya ya Mtama.