Wananchi watakiwa kuchukua tahadhari Kimbunga cha Kenneth

Posted on: April 25th, 2019

Wananchi watakiwa kuchukua tahadhari Kimbunga cha Kenneth

Mkuu wa Mkoa wa Lindi, ambaye pia ni Kaimu Mkuu wa Mkoa wa Ruvuma, Mhe. Godfrey W. Zambi leo Alhamisi tarehe 25/4/2019 amesitisha shughuli za umma kwa muda kutokana na tahadhari ya kujikinga na Kimbunga Kenneth kinachotarajiwa kupita katika mikoa ya Lindi na Ruvuma kuanzia tarehe 25-27 Aprili, 2019. Agizo hili la kusitisha shughuli za serikali halitowahusu watumishi wanaohusika na masuala ya uokoaji wakiwemo wa Idara ya Afya, Jeshi la Zimamoto na Uokoaji, Jeshi la Polisi, Jeshi la Magereza na Jeshi la Akiba.

Kutokana na kuwepo kwa matarajio ya kupita kwa kimbunga hiki, Mhe. Zambi ameagiza yafuatayo:-

• Kuahirisha Maadhimisho ya Siku ya Malaria Kitaifa yaliyokuwa yafanyike leo tarehe 25 Aprili, 2019 katika Manispaa ya Lindi kwenye Viwanja vya shule ya msingi Mpilipili.
• Viongozi wa wilaya za mikoa ya Lindi na Ruvuma wahakikishe kupitia Kamati za Maafa wanasimamia wananchi wanaoishi maeneo hatarishi wanaondoka na kwenda maeneo ya uwanda wa juu palipoandaliwa.
• Wavuvi wote kwenye ukanda wa bahari ya Hindi, Ziwa Nyasa, Mto Ruvuma na mito mingine midogo wasitishe shughuli zao mpaka watakapo taarifiwa.  
• Wananchi wenye ulemavu, wazee na watoto wanaohitaji uangalizi maalum wasaidiwe kupelekwa kwenye maeneo salama kupitia kamati za maafa endapo kutatokea tatizo.
• Wananchi wanatakiwa kuendelea kufuatilia taarifa kupitia vyombo vya habari na mitandao ya kijamii ili kupata taarifa rasmi za serikali ili kuepuka madhara yanayoweza kutokea kutokana na kimbunga Kenneth.

 “Niwaombe wananchi kuzingatia maelekezo yote wanayopewa kuhusu kuchukua tahadhari juu ya uwezekano wa kuwepo kwa kimbunga hiki kwani kwa kutofanya hivyo madhara yanaweza kutokea”, alisema Mhe. Zambi.

Aidha, amewasihi wananchi wote wa mikoa ya Lindi na Ruvuma kuwa watulivu muda wote wakati serikali ikiendelea kufuatilia kwa karibu na kujiandaa kutoa misaada ya kibinadamu endapo maafa yatatokea.