WIZARA YA MALIASILI NA UTALII YATOA VIFAA VYA UONGEZAJI MNYORORO WA THAMANI MAZAO YA MISITU WILAYANI LIWALE.

Posted on: July 1st, 2021

Wizara ya Maliasili na Utalii kupitia mradi wa FORVAC unaodhaminiwa na Serikali ya Finland umetoa vifaa vya uongezaji thamani wa mazao ya misitu kwa vikundi 20 kutoka vijiji 11 vya Wilaya ya Liwale.

Tukio hilo la kukabidhi vifaa hivyo lilifanyika jumamosi,  tarehe 26 Juni 2021 kwenye viwanja vya Ofisi ya Mkuu wa Wilaya ya Liwale ambapo zoezi la ugawaji wa vifaa hivyo lilifanywa na Mhe. Judith Nguli ambaye ni  Mkuu wa Wilaya hiyo. Aidha, Vifaa vilivyotolewa vyenye thamani ya Tsh. Milioni 108 ni pamoja na mizinga ya nyuki na vifaa vya kurinia asali, mashine za kuchana na kukereza mbao, mashine za kuchonga na kusafisha ubao, pikipiki za matairi matatu (guta sinoray 250 cc) kwa ajili ya kusafirishia mazao ya misitu.

FORVAC ni mradi wa uendelezaji mnyororo wa thamani wa mazao ya misitu ambayo kwa Mkoa wa Lindi unatekelezwa katika Wilaya za Liwale, Nachingwea na Ruangwa.